ਆਖਿਰ ਮਾਰਿਆ ਗਿਆ ਬੈਤੁੱਲਾ ਮਹਿਸੂਦ ਵਾਸ਼ਿੰਗਟਨ, 7 ਅਗਸਤ (ਪੀ. ਟੀ. ਆਈ.)-ਤਹਿਰੀਕ-ਏ-ਤਾਲਿਬਾਨ ਦਾ ਮੁਖੀ ਬੈਤੁੱਲਾ ਮਹਿਸੂਦ ਅਤੇ ਉਸ ਦੀ ਦੂਜੀ ਪਤਨੀ 5 ਅਗਸਤ ਨੂੰ ਪਾਕਿਸਤਾਨ ਦੇ ਦੱਖਣੀ ਵਜ਼ੀਰਸਤਾਨ ਖੇਤਰ ਵਿਚ ਅਮਰੀਕੀ ਡਰੋਨ ਹਮਲੇ ’ਚ ਮਾਰੇ ਗਏ

ਆਖਿਰ ਮਾਰਿਆ ਗਿਆ ਬੈਤੁੱਲਾ ਮਹਿਸੂਦ

ਵਾਸ਼ਿੰਗਟਨ, 7 ਅਗਸਤ (ਪੀ. ਟੀ. ਆਈ.)-ਤਹਿਰੀਕ-ਏ-ਤਾਲਿਬਾਨ ਦਾ ਮੁਖੀ ਬੈਤੁੱਲਾ ਮਹਿਸੂਦ ਅਤੇ ਉਸ ਦੀ ਦੂਜੀ ਪਤਨੀ 5 ਅਗਸਤ ਨੂੰ ਪਾਕਿਸਤਾਨ ਦੇ ਦੱਖਣੀ ਵਜ਼ੀਰਸਤਾਨ ਖੇਤਰ ਵਿਚ ਅਮਰੀਕੀ ਡਰੋਨ ਹਮਲੇ ’ਚ ਮਾਰੇ ਗਏ ਸਨ। ਇਸ ਗੱਲ ਦੀ ਪੁਸ਼ਟੀ ਪਾਕਿਸਤਾਨ ਸਰਕਾਰ ਅਤੇ ਤਹਿਰੀਕ-ਏ-ਤਾਲਿਬਾਨ ਨੇ ਕੀਤੀ ਹੈ। ਪਾਕਿਸਤਾਨ ਦੇ ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਦੱਸਿਆ ਕਿ ਅਸੀਂ ਖੁਫ਼ੀਆ ਏਜੰਸੀਆਂ ਤੋਂ ਮਿਲੀ ਜਾਣਕਾਰੀ ਦੇ ਆਧਾਰ ’ਤੇ ਕਹਿ ਸਕਦੇ ਹਾਂ ਕਿ ਬੈਤੁੱਲਾ ਮਹਿਸੂਦ ਮਰ ਗਿਆ ਹੈ। ਪਰ ਅਸੀਂ 200 ਫ਼ੀਸਦੀ ਪੁਸ਼ਟੀ ਲਈ ਮੁਕੰਮਲ ਛਾਣਬੀਣ ਕਰਾਂਗੇ। ਸ੍ਰੀ ਕੁਰੈਸ਼ੀ ਨੇ ਇਹ ਬਿਆਨ ਤਹਿਰੀਕ-ਏ-ਤਾਲਿਬਾਨ ਵਲੋਂ ਇਹ ਪੁਸ਼ਟੀ ਕਰਨ ਕਿ ਉਸ ਦੇ ਨੇਤਾ ਅਤੇ ਉਸ ਦੀ ਪਤਨੀ 5 ਅਗਸਤ ਨੂੰ ਅਮਰੀਕੀ ਡਰੋਨ ਹਮਲੇ ’ਚ ਮਾਰੇ ਗਏ ਹਨ, ਪਿੱਛੋਂ ਦਿੱਤਾ ਹੈ। ਰਿਪੋਰਟਾਂ ਮੁਤਾਬਕ ਤਹਿਰੀਕ-ਏ-ਤਾਲਿਬਾਨ ਨੇ ਇਸ ਗੱਲ ਦਾ ਵੀ ਪ੍ਰਗਟਾਵਾ ਕੀਤਾ ਹੈ ਕਿ ਮਹਿਸੂਦ ਨੂੰ ਕਲ੍ਹ ਨਰਕੋਸਾ ਪਿੰਡ ਵਿਚ ਦਫਨਾ ਦਿੱਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਗ੍ਰਹਿ ਮੰਤਰੀ ਰਹਿਮਾਨ ਮਲਿਕ ਨੇ ਕਿਹਾ ਸੀ ਕਿ ਦੋ ਦਿਨ ਪਹਿਲਾਂ ਅਮਰੀਕੀ ਡਰੋਨ ਹਮਲੇ ਵਿਚ ਮਹਿਸੂਦ ਸ਼ਾਇਦ ਮਰ ਗਿਆ ਹੈ। ਉਨ੍ਹਾਂ ਕਿਹਾ ਸੀ ਕਿ ਸਾਨੂੰ ਸ਼ੱਕ ਹੈ ਕਿ ਬੈਤੁੱਲਾ ਮਹਿਸੂਦ ਮਰ ਗਿਆ ਹੈ ਪਰ ਇਸ ਦੀ ਪੁਸ਼ਟੀ ਲਈ ਸਾਡੇ ਕੋਲ ਸਬੂਤ ਨਹੀਂ ਹਨ। ਉਧਰ ਵਾਸ਼ਿੰਗਟਨ ਵਿਚ ਇਕ ਅਮਰੀਕੀ ਅਧਿਕਾਰੀ ਨੇ ਵੀ ਕਿਹਾ ਕਿ ਮਹਿਸੂਦ ਦੇ ਮਾਰੇ ਜਾਣ ਦੀਆਂ ਰਿਪੋਰਟਾਂ ਮਿਲੀਆਂ ਹਨ ਪਰ ਇਨ੍ਹ੍ਵਾਂ ਦੀ ਅਜੇ ਪੁਸ਼ਟੀ ਨਹੀਂ ਹੋਈ। ਪਾਕਿਸਤਾਨ ਦੇ ਖੁਫੀਆ ਅਧਿਕਾਰੀ ਅਤੇ ਸੁਰੱਖਿਆ ਅਧਿਕਾਰੀ ਉਸ ਵਿਅਕਤੀ ਦੀ ਸ਼ਨਾਖਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਜਿਹੜਾ ਬੈਤੁੱਲਾ ਮਹਿਸੂਦ ਦੀ ਪਤਨੀ ਅਤੇ ਸੱਤ ਸੁਰੱਖਿਆ ਗਾਰਡਾਂ ਨਾਲ ਅਮਰੀਕੀ ਡਰੋਨ ਹਮਲੇ ’ਚ ਮਾਰਿਆ ਗਿਆ ਸੀ। ਮੌਤ ਦੀ ਪੁਸ਼ਟੀ ਨਹੀਂ ਵਾਸ਼ਿੰਗਟਨ -ਰਾਸ਼ਟਰਪਤੀ ਬਰਾਕ ਓਬਾਮਾ ਦੇ ਬੁਲਾਰੇ ਨੇ ਕਿਹਾ ਕਿ ਵਾਈਟ ਹਾਊਸ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕਰ ਸਕਦਾ ਕਿ ਬੈਤੁੱਲਾ ਮਹਿਸੂਦ ਮਾਰਿਆ ਗਿਆ ਹੈ ਪਰ ਜੇਕਰ ਉਸ ਦੇ ਮਾਰੇ ਜਾਣ ਦੀ ਖ਼ਬਰ ਸਹੀ ਤਾਂ ਪਾਕਿਸਤਾਨ ਹੁਣ ਸੁਰੱਖਿਅਤ ਹੈ। ਬੁਲਾਰੇ ਰਾਬਰਟ ਗਿਬਸ ਨੇ ਕਿਹਾ ਕਿ ਬੈਤੁੱਲਾ ਮਰ ਗਿਆ ਹੈ ਜਾਂ ਨਹੀਂ ਇਸ ਗੱਲ ਦੀ ਅਸੀਂ ਪੁਸ਼ਟੀ ਨਹੀਂ ਕਰ ਸਕਦੀ ਪਰ ਭਰੋਸੇਯੋਗ ਅਬਜ਼ਰਵਰਾਂ ਵਿਚ ਇਹ ਸਹਿਮਤੀ ਉਭਰ ਰਹੀ ਹੈ ਕਿ ਉਹ ਸੱਚਮੁੱਚ ਹੀ ਮਰ ਗਿਆ ਹੈ।